Ekipi i Celine Dion ka shprehur zemërimin e tij ndaj Donald Trump për përdorimin e një prej këngëve më të famshme të këngëtares në një tubim fushate në Montana.
Sipas mediave të huaja, gjatë tubimit të Trump dhe JD Vance në Bozeman të premten, 9 gusht, u shfaq një video e Dionit duke performuar “My Heart Will Go On”, hiti i vitit 1997 nga kolona zanore e Titanic.
Në një postim të shpërndarë në llogarinë X të këngëtares të shtunën, më 10 gusht, ekipi i këngëtares i është përgjigjur përdorimit të këngës nga fushata.
“Ekipi menaxhues i Celine Dion dhe kompania e saj diskografike, Sony Music Entertainment Canada Inc., janë vënë në dijeni për përdorimin e paautorizuar të videos, regjistrimit, performancës muzikore dhe imazhit të Celine Dion duke kënduar “My Heart Will Go On” në një fushatë Donald Trump / JD Vance në Montana”, thuhet në njoftim.
