Autoritetet austriake kanë arrestuar një të dyshuar të tretë në lidhje me një sulm të dyshuar terrorist që do organizohej në shfaqjet Eras Tour të Taylor Swift.
Ministri i Brendshëm i Austrisë Gerhard Karner tha ditën e sotme, se një 18-vjeçar u arrestua. Karner tha se adoleshenti kishte qenë në kontakt me të dyshuarin kryesor 19-vjeçar në këtë rast, i cili u arrestua në fillim të kësaj jave së bashku me një të dyshuar 17-vjeçar.
18-vjeçari “vjen nga mjedisi social” i të dyshuarit kryesor, tha Karner. 18-vjeçari dhe i dyshuari kryesor akuzohen si te infiltruar me ISIS.
“Ai kishte qenë në kontakt me autorin kryesor, por nuk është i lidhur drejtpërdrejt me planet e sulmit”, tha ministri austriak. “Por, siç u zbulua disa ditë më parë, ai u betua për besnikëri konkretisht ndaj IS më 6 gusht”.
Swift do të performonte tre koncerte në stadiumin Ernst Happel midis të enjtes, 8 gusht dhe të shtunës, 10 gusht, si pjesë e turneut të saj Eras. Megjithatë, promovuesi i koncerteve Barracuda Music njoftoi të mërkurën se të tre shfaqjet ishin anuluar për shkak të sulmit të planifikuar.
“Shfaqjet e Taylor Swift The Eras Tour në Vjenë u anuluan për shkak të konfirmimit të zyrtarëve qeveritarë për një sulm të planifikuar terrorist,” ndau Barracuda Music në një deklaratë përmes Instagram.
“Me konfirmimin e zyrtarëve qeveritarë për një sulm të planifikuar terrorist në stadiumin Ernst Happel, ne nuk kemi zgjidhje tjetër veçse të anulojmë tre shfaqjet e planifikuara për sigurinë e të gjithëve.”
